Censo de aves invernantes na Ría de Ribadeo

Zona media da ría, con Ribadeo ó fondo

Pois aquí van os resultados do meu censo de aves acuáticas invernantes 2020 na ría. As cifras son o resultado de varios días de observacións. Nestes días encontreime tamén cos encargados de elaborar os censos para a Xunta de Galicia e o Principado de Asturias, así coma con outros aficionados á ornitoloxía que viñan pola súa conta. Así, en diferentes xornadas coincidín con xente coma Gustavo Martínez Lamas, Jilberto S. Jardón, Pablo Fernández ou Luis Mario Arce. Como digo sempre, a Ría de Ribadeo debe ser o humidal mellor censado, xa que ademais dos censos das dúas administracións autonómicas, normalmente veñen tamén censar membros da SGHN, nalgúns anos a COA, e nos últimos anos súmase tamén o censo deste blog. Así que entre todos, malo será que se quede algo sen censar, digo eu... En fin, imos cos meus números:

3	Gavia immer	Colimbo Grande	Mobella grande
1	Tachybaptus ruficollis	Zampullín Común	Mergullón pequeno
1	Podiceps cristatus	Somormujo Lavanco	Mergullón cristado
1	Podiceps auritus	Zampullín Cuellirrojo	Mergullón real
15	Podiceps nigricollis	Zampullín Cuellinegro	Mergullón de pescozo negro
40	Phalacrocorax carbo	Cormorán Grande	Corvo mariño
3	Phalacrocorax aristotelis	Cormorán Moñudo	Corvo mariño cristado
68	Bubulcus ibis	Garcilla Bueyera	Garza boieira
32	Egretta garzetta	Garceta Común	Garzota
30	Ardea cinerea	Garza Real	Garza real
25	Platalea leucorodia	Espátula Común	Cullereiro
244	Anas penelope	Silbón Europeo	Pato asubiador
16	Anas strepera	Anade Friso	Pato frisado
95	Anas crecca	Cerceta Común	Cerceta
512	Anas platyrhynchos	Anade Azulón	Lavanco
27	Anas acuta	Anade Rabudo	Pato rabilongo
2	Melanitta nigra	Negrón Común	Pentumeiro
18	Haematopus ostralegus	Ostrero Común	Lampareiro - gabita
17	Pluvialis squatarola	Chorlito Gris	Píllara cincenta
75	Calidris alpina	Correlimos Común	Pilro común
3	Limosa limosa	Aguja Colinegra	Mazarico rabinegro
13	Numenius phaeopus	Zarapito Trinador	Mazarico chiador
58	Numenius arquata	Zarapito Real	Mazarico real
7	Tringa totanus	Archibebe Común	Bilurico patirrubio
43	Tringa nebularia	Archibebe Claro	Bilurico pativerde
19	Actitis hypoleucos	Andarríos Chico	Bilurico das rochas
225	Chroicocephalus ridibundus	Gaviota Reidora	Gaivota chorona
130	Larus fuscus	Gaviota Sombría	Gaivota escura
40	Larus michahellis	Gaviota Patiamarilla	Gaivota patiamarela
1	Larus marinus	Gavión	Gaivotón
10	Sterna sandvicensis	Charrán Patinegro	Carrán cristado
2	Circus aeruginosus	Aguilucho Lagunero	Tartaraña das xunqueiras
3	Pandion haliaetus	Águila Pescadora	Aguia pescadora

Zona externa da ría

Pena furada e praia de Arnao ó fondo. Zona externa da ría

 
Co censo na man, un dos primeiros indicadores nos que nos fixamos sempre é nas anátidas. E este ano os datos son moi chamativos, xa que o descenso no número de exemplares invernantes é considerable. Por exemplo, no caso do pato asubiador (Anas penelope), falamos de que hai case a metade de exemplares que nos últimos tres anos. Ocorre algo similar coas cercetas (Anas crecca), ainda que é certo que estas teñen maior variabilidade no noso estuario ó longo dos anos. Pero, sen dúbida, o dato máis chamativo de todo o censo e o do pato rabilongo (Anas acuta), do que temos a cifra máis baixa desde que existen rexistros, fai mais de corenta anos. E aínda que o descenso da súa poboación invernante é unha tendencia na Ría de Ribadeo, este ano o dato é extraordinariamente baixo. A presenza de tan só 27 exemplares, fronte á media de máis de douscentos da última década, é realmente chamativo. Ainda que hai que dicir que debeu haber un desprazamento de exemplares a outro lugar, xa que a comezos de decembro había 80 exemplares. De tódolos xeitos estes datos van acordes ós de outros humidáis peninsulares, nos que a invernada de anátidas este ano está sendo moi pobre. Coma sempre, os datos dos censos hai que analizados a medio prazo, coa perspectiva de varios anos, para poder sacar conclusións.





Tamén son baixos os números para as limícolas, sendo especialmente destacable a escasa presenza de mazarico rabinegro (Limosa limosa) acostumados ás cifras dos últimos anos. Do mesmo xeito, o pilro común presenta unha cifra moito máis baixa do habitual. Os mazaricos real e chiador, pola contra, están en cifras similares ó ano pasado, mentres que este ano o que aumentou a súa presenza de xeito destacable foi a píllara cincenta, que fluctúa moito dun ano para outro.

Lampareiros - Ostreros

Para finalizar con esta pequena análise dos datos resaltar, cómo non, a presenza das tres aguias pescadoras invernantes, repetindo así a cifra dos últimos catro anos. Unha especie que, por certo, cumpre 10 anos coma invernante no noso estuario. Tamén destacable a presenza este ano de mergullón real (Podiceps auritus) e de mergullón cristado (Podiceps cristatus), especies que chaman a atención na nosa ría.

Zona interna da ría

Para unha próxima entrada deixo as fotos que tiven tempo de sacar estes días entre conteo e conteo.

Saúdos e ata a próxima.


Imaxes e texto baixo licenza Creative Commons
Enrique Sampedro Miranda
Blog Ría de Ribadeo: www.riaderibadeo.com