Hoxe saía publicado en La nueva España unha nova segundo a que os gobernos da Xunta de Galicia e do Principado de Asturias, poderían reunirse antes de finais de ano cos 14 municipios galegos e asturianos que forman a Reserva da Biosfera do río Eo, Oscos e Terras de Burón. Este encontro sería para por en marcha o tan demandado órgano xestor da reserva, que leva sen constituírse desde que a UNESCO distinguira esta comarca astur-galaica coma Reserva da Biosfera, a única interautonómica de todo o Estado. Así pois, confiemos en que esta vez si, e por fin, despois de 5 anos, se poida constituír oficialmente o citado organismo. De non facelo, incumpriríase o prazo límite fixado polo comité da UNESCO para que tódalas reservas cumpran coa normativa e creen o seu órgano xestor, xa que este prazo finaliza en 2013.
 |
| Ría de Ribadeo. Reserva da Biosfera do río Eo, Oscos e Terras de Burón. |
Desde este blog lévase pedindo fai moito tempo a urxencia desta actuación. E non só polo risco que podía supoñer o carecer deste organismo para que a UNESCO retirara a súa distinción, senón porque o considero imprescindible para poder levar a cabo políticas e liñas de acción comúns para toda a reserva. Trátase do primeiro paso para poder comezar a camiñar na boa dirección, e aproveitar en tódolos sentidos unha distinción que en moitos outros lugares devecen por ter, e nós, que a temos, estamos a desaproveitar.
 |
| Río Eo. Reserva da Biosfera do río Eo, Oscos e Terras de Burón |
Imágenes y texto bajo licencia Creative Commons
Enrique Sampedro Miranda
Ría de Ribadeo: http://ria-de-ribadeo.blogspot.com
